Það þótti bulli og þvaður

að ætla verða listamaður

“Það er ekki hægt að verða,

bara vera, þannig er þa’”

sagði fólk sem ekkert vissi,

en gat huggað sig við missi.

„Og svo þarftu að vera þjáður,

frekar illa fjáður

og aldrei, helst, alsgáður.

Já og bera þunga byrði

það er inntökuskilyrði.

Vera óhræddur við mistök

en gera þau samt ekki

og mála svo á mannorð sitt

myndarlega flekki.

Hafa alltaf af sjálfum sér

marga sögu að segja

og vita að lífið það er tilgangslaust

ef þú ert ekki að deyja.

Svo fátt eitt hér sé nefnt,

ef loforðið um listamann

í þér skal vera efnt.

Því þó þeir séu aumingjar

sem veigra sér við vinnu

og skortir alla sinnu,

þá endast ósköp fáir þar til lengdar

í að finna alltaf til svengdar

og á endanum þá er það kannski

bara þessi sterki

sem meikar þessa fokking listaverki.“

Texti: Vilhjálmur B. Bragason

Vilhjálmur mun lesa upp ljóð á morgun, sunnudaginn 2. september kl. 14, á Listasafni Akureyrar. Upplesturinn er hluti af upplestrarröðinni Til málamynda, sem verður í Listasafni Akureyrar alla sunnudaga í september klukkan 14, þar sem ljóðskáldin munu eiga í samtali við valin verk og reyna að búa til nýja tilfinningu, nýja upplifun, nýtt pláss í huga þeirra sem vilja ljá augu og eyru. Hér má lesa nánar um upplestrarröðina.

Auglýsingar