Newborn

hvíslið nafninu

merkið landakortið

endurnýjið vegabréfið

glösin brotna á gólfinu

mér svelgist á hamborgaranum

karlar dansa!

Ramush Haradinaj,

bamm bamm!

það fer tveimur sögum af Ramush

en hér skiptir bara önnur þeirra máli

ég þarf vegabréf til að heyra hina

þið hafið séð þetta allt áður

gamall dans

í nýju landi

gömlu andspyrnuhetjurnar

bjóða upp á

bjór og minningar

við skiptumst á fótboltamönnum

Behrami fyrir Eið Smára

mosku fyrir leigubíl

Björk fyrir leigubílstjórann

sjálfstæði fyrir leigubílstjórann!

þið fyllið upp í himininn

myrkrið er á undan áætlun

leigubílstjórinn á réttum tíma

Í höfuðborginni

hrjóta risarnir á meðan

50 cent slær Tesla í gólfið

þið fljúgið yfir blóðuga velli

skiptið á rafmagni fyrir frið

hóruhúsum fyrir vopnabúr

nýburaland

sorgarland

Svartþrastaland

það syngur enginn þjóðsönginn

á banastundinni

Luan Haradinaj,

bamm bamm!

Ásgeir H Ingólfsson

birtist upphaflega í Grimmum ævintýrum, sem Nýhil gaf út árið 2010

Auglýsingar